Գլխավոր Նորություններ

PayX-ի մոբայլ վճարումներն արդեն ամենուր հասանելի կլինեն

PayX-ի մոբայլ վճարումներն արդեն ամենուր հասանելի կլինեն

Հինգշաբթի 06.12.2018

Երևանում պաշտոնապես ներկայացվել է PayX հայկական ֆինտեխ ստարտափը, որի նորարարական լուծումները հնարավորություն կընձեռեն մոբայլ հեռախոսներով կատարել արագ ու անվտանգ անկանխիկ վճարումներ՝ մեկ հպումով։ 

Դեկտեմբերի 4-ի երեկոյան կայացած շնորհանդեսին մասնակցել են VISA International-ի, ՀՀ Կենտրոնական բանկի, ArCa վճարային համակարգի, ինչպես նաև հայաստանյան տարբեր բանկերի և խոշոր ՏՏ կազմակերպությունների ներկայացուցիչներ։

PayX ընկերությունը ստեղծում է մոբայլ հեռախոսներով վճարումներ կատարելու համար միասնական ենթակառուցվածք, որում հնարավոր է կատարել վճարումներ QR կոդերի ընթերցման միջոցով։ Վճարումները հնարավոր է կատարել PayX հավելվածով, ինչպես նաև գործընկեր կազմակերպությունների և բանկերի մոբայլ հավելվածներով։

Ընկերության համահիմնադիր Սմբատ Նասիբյանի խոսքով՝ PayX-ի հիմնական առավելությունն այն է, որ ոչ թե QR վճարումների լոկալ միավոր է ստեղծում, այլ բոլորին համագործակցելու հնարավորություն է ընձեռում:

«Մենք բոլոր կառույցներին տալիս ենք լրացուցիչ անվճար ծառայություն, որպեսզի նրանք կարողանան թույլ տալ հաճախորդներին իրենց հավելվածներում օգտվել մյուս մասնակիցների ընձեռած հնարավորություններից»,- ասել է նա:  

Սմբատ Նասիբյանը հույս է հայտնել, որ PayX-ը կզարգանա և հնարավորություն կտա, որ այլ երկրների քարտերը ևս կարողանան կցվել և սպասարկվել առևտրային կետերում: 

«Մենք տեղական ֆինտեխ ստարտափ ենք, և մեր բոլոր նախաձեռնություններն իրականացնում ենք ինքնուրույն, մեր սեփական ուժերով: Ծրագրավորումն ու կազմակերպչական բոլոր աշխատանքները կատարել է մեր թիմը: Համագործակցել ենք ArCa ընկերության և Visa Internaitonal-ի հետ»,- հավելել է PayX-ի համահիմնադիր Բենիամին Թադևոսյանը։ 

Ընկերությունն արդեն համագործակցում է հայաստանյան 6 բանկերի՝ Evocabank, Արարատբանկ, ՎՏԲ-Հայաստան Բանկ, Յունիբանկ, Ամերիաբանկ, Արդշինբանկ, ինչպես նաև 3 վճարային համակարգերի հետ՝ ՄոբիԴրամ, Easy Pay և «Արմենիան Քարդ»:

PayX հավելվածում առկա է նաև ակումբային և զեղչային քարտերի «թվայնացման» հնարավորություն, որի շնորհիվ օգտատերն ազատվում է դրամապանակն ամենուր իր հետ կրելու անհրաժեշտությունից։

Առաջիկայում PayX հավելվածում հնարավոր կլինի իրականացնել քարտից քարտ փոխանցումներ, վարկերի մարումներ և կոմունալ վճարումներ։ 

Ընկերությունը հայաստանյան շուկային է առաջարկում նաև MerchantX հավելվածը, որը նախատեսված է խանութների, ռեստորանների և ծառայություններ մատուցող կազմակերպությունների համար և կարող է օգտագործվել անկանխիկ վճարումներն ինչպես տեղում, այնպես էլ հեռահար ընդունելու համար։ 

Նախագիծն իրականացվում է VISA International-ի աջակցությամբ։

 

Թողնել մեկնաբանություն