Բիզնես ոլորտում գլխավոր գործադիր տնօրեններն ամենաշատ վարձատրվող պաշտոնյաներն են, որոնք երբեմն սովորական աշխատակիցներից ավելի քան 1000 անգամ ավելի շատ գումար են ստանում: 

Այս մասին ասվում է 24/7 Wall St.-ի զեկույցում, որում անդրադարձ է արվել Միացյալ Նահանգներում ամենաշատ վաստակող գլխավոր գործադիր տնօրեններին:

Ընդհանուր առմամբ ցանկում ներառվել է 101 ղեկավար: Համաշխարհային ապահովագրական MetLife հոլդինգի հայազգի նախագահ, ղեկավար և գլխավոր գործադիր տնօրեն Սթիվեն Քանդարյանը զբաղեցրել է ցանկի 73-րդ հորիզոնականը: Մեծահարուստը մեկ տարում ստացել է 14,7 մլն դոլար:

Ինչ վերաբերում է ցանկի առաջատարներին, ապա նրանք են Oracle ընկերության ղեկավարներ Սաֆրա Քաթսն ու Մարկ Հուդը, որոնցից յուրաքնչյուրը մեկ տարում ստացել է 108,3 մլն դոլար:

Երրորդ տեղում է Disney-ի գործադիր տնօրեն Ռոբերտ Այգերը՝ 65,6 մլն դոլար ցուցանիշով: Նշվում է, որ Այգերն ընկերության միջին վիճակագրական աշխատողներից 1424 անգամ ավելի շատ է  վարձատրվել:

Չորրորդ հորիզոնականում Comcast-ի ղեկավար Բրայան Ռոբերտսն է, որը 32,5 մլն աշխատավարձ է ստացել:  Առաջատար հնգյակը եզրափակել է J.P. Morgan Chase-ի ղեկավար Ջեյմս Դայմոնը՝ 31 մլն դոլար ցուցանիշով: